परासी । नेपाल स्वयंसेवी रक्तदाता समाज जिल्ला शाखा पश्चिम नवलपरासीको आयोजनामा परासीस्थित पाल्ही बहुमुखी क्याम्पसमा पहिलो रक्तदान कार्यक्रम सम्पन्न भएको छ। नेपाल रेडक्रस सोसाइटी जिल्ला शाखाद्वारा सञ्चालित रक्त सञ्चार केन्द्रको प्राविधिक सहयोगमा भएको यस कार्यक्रममा २२ जनाले रक्तदान गरेका थिए ।
कार्यक्रममा नवलपरासी उद्योग वाणिज्य संघका अध्यक्ष ओमप्रकाश अग्रहरीले रक्तदानलाई सबैभन्दा ठूलो दानको रूपमा व्याख्या गर्दै यसले जीवन बचाउनुका साथै रक्तदातालाई पनि स्वस्थ राख्ने बताए। उनले प्रत्येक तीन-तीन महिनामा रक्तदान गर्न आग्रह गर्दै जिल्लामा रगतको अभावले कसैले पनि ज्यान गुमाउन नपरोस् भन्ने समाजको उद्देश्यलाई सबैले साथ दिनुपर्नेमा जोड दिए।
नेपाल स्वयंसेवी रक्तदाता समाज जिल्ला शाखा नवलपरासीका अध्यक्ष मोहन पौडेलले रगत अभाव बढ्दै गएको र रक्तदानबारे सचेतना भए पनि मानिसहरू हिचकिचाउने गरेको बताए। उनले रक्तदान गर्दा कमजोरी हुने भ्रममा नपर्न आग्रह गर्दै समाजले रेडक्रसको सहयोगी संस्थाको रूपमा रगत व्यवस्थापनमा भूमिका खेल्ने बताए। समाजले विशेषगरी ग्रामीण क्षेत्रमा रक्तदान सम्बन्धी सचेतना फैलाउने र रक्तदान कार्यक्रम आयोजना गरी मानिसहरूलाई प्रेरित गर्ने लक्ष्य लिएको छ। कार्यक्रममा विभिन्न संस्थाका प्रतिनिधि तथा अतिथिहरूले शुभकामना व्यक्त गरेका थिए।
