नवलपुर । मध्यविन्दु नगरपालिका वडा नम्बर ३, इटौरामा अवस्थित जनता माध्यमिक विद्यालय नन्दभाउजुमा हिंसा र द्वन्द्व सम्बन्धी सचेतनामूलक कार्यक्रम सम्पन्न भएको छ । किशोरी सशक्तीकरण कार्यक्रमको एक भागको रूपमा आयोजना गरिएको यस कार्यक्रममा ३० जना साथी शिक्षकहरूले विद्यालय र समुदाय स्तरमा सिकेका कुराहरू आफ्ना साथीहरूलाई सिकाएका थिए ।
जागृती बाल तथा युवा सरोकार नेपालले क्यान्नलनको सहयोग र मध्यबिन्दु नगरको साझेदारीमा यस्ता कार्यक्रमहरू सञ्चालन गर्दै आएको संस्थाका महासचिव दिपक शर्माले जानकारी दिनुभयो । उहाँका अनुसार, यस्ता कार्यक्रमहरूले किशोरकिशोरीहरूलाई सशक्त बनाउन मद्दत पुर्याउँछ ।
कार्यक्रममा, सहजकर्ता तथा साथी शिक्षक जेसिका महतोले हिंसा र द्वन्द्वको परिभाषा, प्रकार, सम्भावित स्थान र पात्रहरू, नकारात्मक प्रभावहरू र बच्ने उपायहरू जस्ता महत्वपूर्ण विषयहरूमा छलफल गराउनुभएको थियो । यस कार्यक्रमले युवाहरूमा हिंसा र द्वन्द्वबारे चेतना जगाई एकअर्कालाई सहयोग गर्ने भावनाको विकास गर्नमा महत्वपूर्ण भूमिका खेलेको छ । कार्यक्रममा सहभागीहरूले हिंसा र द्वन्द्वमुक्त समाज निर्माणमा आफ्नो तर्फबाट योगदान दिने प्रतिबद्धता जनाएका छन् ।
