नेपालगञ्ज । कर्णाली प्रदेश प्रहरी प्रमुख प्रहरी नायव महानिरीक्षक (डिआइजी) जय राज सापकोटाले कर्णाली प्रदेश प्रहरी तालिम केन्द्र, सुर्खेत हाल नेपालगञ्जको स्थलगत अनुगमन तथा निरीक्षण गर्नुभएको छ । निरीक्षणका क्रममा डिआइजी सापकोटाले कार्यालयको समग्र वस्तुस्थिति, भौतिक पूर्वाधार, आन्तरिक शाखाहरू, उपलब्ध स्रोत साधन तथा कार्यालयले गरेका नवप्रवर्द्धनात्मक कार्यहरूको बारेमा जानकारी लिनुभयो ।
साथै, उहाँले कार्यालयबाट सम्पादित काम कारबाही, सेवा प्रवाह र गुनासो सम्बोधनको अवस्थाबारे अवलोकन गर्दै कार्यरत प्रहरी कर्मचारीहरूलाई आवश्यक निर्देशन समेत दिनुभयो । सम्बोधनका क्रममा उहाँले प्रहरी सेवाको साख अभिवृद्धि गर्ने गरी सेवालाई थप गुणस्तरीय र प्रभावकारी बनाउनुपर्नेमा जोड दिनुभयो । डिआइजी सापकोटाले सम्पूर्ण प्रहरी कर्मचारीहरूलाई पेसागत निष्ठा, व्यावसायिक दक्षता र उच्च नैतिकताका साथ आफ्नो काम, कर्तव्य र अधिकारको पालना गर्न निर्देशन दिनुभएको छ ।
