अर्घाखाँची । अर्घाखाँची जिल्ला प्रहरी कार्यालयको आयोजनामा "समुदाय-प्रहरी साझेदारी" कार्यक्रम अन्तर्गत सन्धिखर्क नगरपालिका वडा नं. ०१, हटारीस्थित युवावर्ष जनता रविचित्र माध्यमिक विद्यालयमा लागुऔषध दुर्व्यसन न्यूनीकरण सम्बन्धी एक प्रशिक्षण कार्यक्रम सम्पन्न भएको छ ।
विद्यालयका कक्षा ९ र १० मा अध्ययनरत करिब ९० जना विद्यार्थीको सहभागिता रहेको उक्त कार्यक्रममा जिल्ला प्रहरी कार्यालयका प्रहरी सहायक निरीक्षक सङ्गीत परियारले प्रशिक्षण दिनुभएको थियो । उहाँले लागुऔषध दुर्व्यसनका नकारात्मक असरहरू, यसबाट बच्ने उपायहरू र समाजमा यसको न्यूनीकरणका लागि विद्यार्थी तथा समुदायको भूमिकाबारे विस्तृत जानकारी गराउनुभयो।
कार्यक्रमको मुख्य उद्देश्य युवा पुस्तालाई लागुऔषध दुर्व्यसनको दलदलमा फस्नबाट बचाउनु र यस विषयमा सचेतना फैलाउनु रहेको प्रहरीले जनाएको छ । "समुदाय-प्रहरी साझेदारी" कार्यक्रम अन्तर्गत यस्ता जनचेतनामूलक कार्यक्रमहरूलाई निरन्तरता दिइने जिल्ला प्रहरी कार्यालयले बताएको छ।
