पाल्पा । नेकपा माओवादी केन्द्रको वरिष्ठउपाध्यक्ष नारायणकाजी श्रेष्ठले सामाजिक, आर्थिक रुपान्तरण को क्षेत्रमा नेपाली समाजले आवश्यकता अनुसारको काम गर्न नसकेको बताएका छन् । शनिबार माओवादी केन्द्र तानसेन नगर समिति, पाल्पाको तेस्रो नगर अधिवेशनलाई सम्बोधन गर्दै उनले केहीपनि भएको छैन् भन्ने होईन, निश्चित रुपमा प्रगती भएपनि जति हुनुपर्ने त्यति नभएको बताए ।
उनले भने, ‘सामाजिक, आर्थिक रुपान्तरणको क्षेत्रमा, विकास र समृद्धिको क्षेत्रमा, जति फड्को मार्नुपर्ने हो त्यति नेपाली समाजले मार्न सकेको छैन् । केही पनि भएको छैन् भन्ने होईन, निश्चित रुपमा प्रगती भएका छन्, सुधार भएका छन् । तर यति धेरै राजनीतिक परिवर्तन भयो, हजार सहिदको बलिदानको मूल्यमा र जनताको यति ठूलो संघर्षको परिणाम स्वरुप ठूलो राजनीतिक परिवर्तन भयो, राजनीतिक परिवर्तनले दिएको अधिकारहरु उपभोग गर्न त पायौं, तर जति हुनुपर्ने भएको छैन् ।’
यसको साथै, उनले देश र जनताको पक्षमा काम गर्न, सामाजिक आर्थिक रुपान्तरणको प्रक्रियालाई अगाडि बढाउन र समाजवादको आधार तयार पार्न सरकार र सदनमा भूमिका खेल्ने बताए । उनले भने, ‘हामी सरकारमा जान चाहन्छौ, देश र जनताको पक्षमा काम गर्न, सामाजिक आर्थिक रुपान्तरणको प्रक्रियालाई अगाडि बढाउन र समाजवादको आधार तयार पार्न र हामी सदनमा पनि यसैको लागि भूमिका खेल्न चाहन्छौ । हामी सबै ठाँउमा देश र जनताको पक्षमा काम गर्नको लागि जान चाहन्छौं । जनतासँगै जोडिएर जागरण अभियान, जनदबाब र जनसंघर्ष पनि अगाडि बढाउन चाहन्छौ ।’
