भैरहवा । जिल्ला प्रहरी कार्यालय, रुपन्देहीले तीन दिनको विशेष अपरेसनमा १५ लाख ६२ हजार ४१५ रुपैयाँ बराबरको भन्सार छली तथा चोरी पैठारीका अवैध सामान बरामद गरेको छ । साउन २४ देखि २६ गतेसम्म सञ्चालन गरिएको उक्त कारबाहीमा संलग्न दुई जनालाई पनि प्रहरीले पक्राउ गरेको छ ।
जिल्ला प्रहरी कार्यालय, रुपन्देहीका अनुसार, साउन २४ र २५ गते ९ लाख ९६ हजार ६१० रुपैयाँ बराबरको अवैध सामान बरामद गरिएको थियो । बरामद गरिएका सामग्रीमा मोटरसाइकल, तयारी पोसाक, स्याउ, चिनी र बोइलर कुखुरा रहेको प्रहरीले जनाएको छ ।
त्यस्तै, साउन २५ र २६ गते थप कारबाही गर्दै ५ लाख ६५ हजार ८०५ रुपैयाँ बराबरको अवैध सामान नियन्त्रणमा लिइएको हो । यस अवधिमा बोइलर कुखुरा, लत्ताकपडा, किराना सामान, तरकारी, औषधि तथा अन्य दैनिक उपभोग्य वस्तुहरु बरामद गरिएको छ । प्रहरीले एक ई-रिक्सा चालकलाई पनि नियन्त्रणमा लिएको जानकारी दिएको छ ।
बरामद गरिएका सम्पूर्ण सामान आवश्यक कारबाहीका लागि भैरहवा भन्सार कार्यालय र पशु क्वारेन्टाइन कार्यालयमा बुझाइएको रुपन्देहीका प्रहरी प्रमुख, प्रहरी उपरीक्षक (एसपी) प्रदिप बहादुर क्षेत्रीले बताउनुभयो । सीमा क्षेत्रमा हुने अवैध कारोबार नियन्त्रण गर्न प्रहरीले सक्रियता बढाएको उहाँले जानकारी दिनुभयो । पछिल्लो समय रुपन्देही प्रहरीले नियमित रुपमा भन्सार छलीका सामानहरु बरामद गर्दै आएको छ ।
