धनगढी । डिभिजन वन कार्यालय, धनगढीका सहायक वन अधिकृत पूर्ण शंकर यादव घुस रकमसहित रंगेहात पक्राउ परेका छन् । अख्तियार दुरुपयोग अनुसन्धान आयोग, महेन्द्रनगरको टोलीले उनलाई ७ लाख ३१ हजार रुपैयाँ घुस लिँदै गर्दा कार्यालयबाटै नियन्त्रणमा लिएको हो ।
अख्तियारका प्रवक्ता राजेन्द्र कुमार पौडेलका अनुसार, सेवाग्राहीसँग घुस मागेको भन्ने विशेष सूचनाको आधारमा आयोगको महेन्द्रनगर कार्यालयबाट खटिएको टोलीले यादवलाई पक्राउ गरेको हो । टोलीले उनको साथबाट घुसबापत लिएको नगद सात लाख ३१ हजार रुपैयाँ समेत बरामद गरेको छ ।
यादवलाई धनगढीस्थित डिभिजन वन कार्यालय परिसरबाटै नियन्त्रणमा लिइएको र उनीमाथि थप अनुसन्धान भइरहेको प्रवक्ता पौडेलले जानकारी दिए । सरकारी कार्यालयमा हुने भ्रष्टाचार नियन्त्रण गर्ने अभियान अन्तर्गत अख्तियारले पछिल्लो समय निगरानी बढाउँदै लगेको छ । यसै क्रममा भएको यो पक्राउले सरकारी निकायभित्रको भ्रष्टाचारको सञ्जाललाई उजागर गरेको छ ।
