कञ्चन । रुपन्देहीको सैनामैना, कञ्चन र गैडहवा क्षेत्रमा क्रियाशील पत्रकारहरूले गौतमबुद्ध प्रेस क्लब नामक साझा संगठन गठन गरेका छन् । यस भेलाले ९ सदस्यीय तदर्थ समिति चयन गरेको छ, जसको अध्यक्षमा साझा टेलिभिजन एच डी का स्टेशन म्यानेजर थानेश्वर घिमिरे (नविन) निर्वाचित भएका छन् ।
क्लबको उपाध्यक्षमा रेडियो आवाजका कृष्ण भण्डारी, महासचिवमा रेडियो सैनामैनाका अनिल पहाडी, सचिवमा लुम्बिनी दैनिकाका सम्वाददाता अनिता चौधरी र कोषाध्यक्षमा रेडियो टाइम्सका नरेश चौधरी सर्वसम्मत चयन भएका छन्।
सदस्यहरूमा हाम्रो लुम्बिनी खबरका दिनेश घिमिरे, रेडियो कञ्चनका गोबिन्द आचार्य, उज्यालो अनलाईनका रमेश गैरे र रेडियो मलमलाका रितु पौडेल रहेका छन् । वरिष्ठ पत्रकार छवि पाण्डे, डिआर पन्थी र भुवन जी.सीलाई क्लबको सल्लाहकारमा मनोनयन गरिएको छ ।
नवगठित क्लबको उद्देश्य आवाजविहीनहरूको आवाज उठाउने, सामाजिक सरोकारका विषयमा अन्तरक्रिया गर्ने, मिडिया हाउसहरूको प्रवर्द्धन गर्ने तथा पत्रकार, सञ्चारकर्मी र मिडिया उद्यमीहरूको हकहितमा काम गर्ने रहेको अध्यक्ष घिमिरेले बताए । उनले अग्रज पत्रकारलाई सम्मान गर्दै नवसञ्चारकर्मीलाई व्यावसायिक र उत्तरदायी पत्रकारिताका लागि प्रोत्साहन गर्ने प्रतिबद्धता पनि जनाए ।
सैनामैना, कञ्चन र गैडहवामा टेलिभिजन, रेडियो र अनलाईन लगायत एक दर्जनभन्दा बढी सञ्चार गृहहरूमा दुई दर्जनभन्दा बढी सञ्चारकर्मी आबद्ध छन् । क्लबलाई विभिन्न निकायमा दर्ता गर्नका लागि विधान मस्यौदा तयार गरी प्रक्रिया अगाडि बढाउने निर्णय पनि भएको छ ।
