रुपन्देहीको रोहिणीमा खाल्डोमा डुबेको अवस्थामा युवकको शव फेला, अनुसन्धान सुरु

भैरहवा । रुपन्देहीको रोहिणीमा २८ वर्षीय कलामुदिन अन्सारीको शव पानी जमेको खाल्डोमा डुबेको अवस्थामा फेला परेको छ। आज बिहान करिब सवा ६ बजेतिर रोहिणी गाउँपालिका-६ चम्किपुरस्थित मझनु चोकदेखि छिपागड आउने भित्री सडकखण्डमा स्थानीयले अन्सारी र उनको UP 56 AJ 6879 नम्बरको मोटरसाइकल खाल्डोमा डुबेको देखेका थिए।

तत्कालै प्रहरीलाई खबर गरेपछि इलाका प्रहरी कार्यालय धकधईको टोली घटनास्थल पुगेको थियो। बिहान करिब ७:४० बजेतिर शवको पहिचान खुलेको हो। मृतक रुपन्देही रोहिणी-४ पकडिहवाका ईद्रिस धुनियाका छोरा कलामुदिन अन्सारी रहेको प्रहरीले जनाएको छ।

प्रारम्भिक जानकारी अनुसार, अन्सारी सेमरहवामा कुखुरा काट्ने र बेच्ने काम गर्दै आएका थिए। जिल्ला प्रहरी कार्यालय रुपन्देहीका डिएसपी तथा सूचना अधिकारी सुरज कार्कीले घटनाबारे थप अनुसन्धान भइरहेको जानकारी दिएका छन्। घटनाको थप विवरण आउन बाँकी छ।