धकधई । नेपाली कांग्रेसका तर्फबाट रूपन्देही क्षेत्र नं. १ का प्रतिनिधि सभा सदस्य उम्मेदवार हिरा बहादुर खत्रीले धकधईमा आयोजित निर्वाचन सम्पर्क कार्यालय उद्घाटन कार्यक्रममा बोल्दै आफूलाई एक गर्विलो 'स्वयं किसान' का रूपमा प्रस्तुत गर्नुभएको छ ।
आफ्नो वास्तविक पहिचान नै खेतीपाती र पशुपालन भएको बताउँदै उहाँले नीति निर्माणको तहमा पुगेर किसानका वास्तविक पीडा सम्बोधन गर्नु नै आफ्नो मुख्य संकल्प रहेको उल्लेख गर्नुभयो। विगतमा कृषि आधुनिकीकरणका भाषण भए पनि ठोस नीति र कानुनको अभावमा बजेट खर्च हुन नसकेको र किसानले सधैं मलखाद, बिउबिजन तथा सिंचाइको अभाव झेल्नुपरेको यथार्थलाई उहाँले औंल्याउनुभयो ।
विशेषगरी वितरण प्रणालीमा रहेको त्रुटी र भारतबाट मल ल्याउँदा किसानले भोग्नुपर्ने प्रशासनिक झमेला अन्त्यका लागि आफूले व्यावहारिक कदम चाल्ने उहाँले प्रतिबद्धता जनाउनुभयो । देशको राजनीतिक इतिहासमा नेपाली कांग्रेसले राणा शासनदेखि संविधान निर्माणसम्म नेतृत्वदायी भूमिका खेलेको स्मरण गराउँदै नेता खत्रीले संकटको समयमा कांग्रेसले नै निकास दिने बताउनुभयो। पछिल्लो समय "जादुगर" शैलीमा देश बदल्ने भ्रम फैलाउने तत्वहरू सक्रिय भएको भन्दै उहाँले युवाहरूलाई सचेत रहन आग्रह गर्नुभयो ।
उहाँका अनुसार देशको विकास कुनै जादुको छडीले नभई समस्याको सही पहिचान र समाधानका उपायबाट मात्र सम्भव छ। नेपाली कांग्रेसको महाधिवेशनपछि गगन थापा जस्ता युवा नेताहरूको प्रभाव र नयाँ सोचका साथ पार्टी अघि बढेको उल्लेख गर्दै उहाँले विगतका कमजोरी सुधारेर जनताको विश्वास जित्ने संकल्प गर्नुभयो। केन्द्रिय तथा स्थानीय नेताहरूको उपस्थितिमा सम्पन्न उक्त कार्यक्रममा खत्रीले समृद्धिको यात्रामा सबैलाई साथ दिन आह्वान गर्नुभएको थियो।
