नुवाकोट । रसुवाको भोटेकोशीमा आएको विनाशकारी बाढीले पक्की पुल बगाएपछि ठप्प बनेको नुवाकोटको देवीघाट क्षेत्रमा नेपाली सेनाले निर्माण गरिरहेको एक्रो ब्रिज जडानको कार्य सम्पन्न भएको छ। सेनाको प्राविधिक टोलीको निरन्तरको प्रयासपछि पुल जडानको काम पूर्ण भएको हो।
विनासकारी बाढीले पक्की पुल बगाएपछि नुवाकोट र आसपासका क्षेत्रको यातायात सम्पर्क पूर्ण रूपमा विच्छेद भएको थियो। सेनाले विगत पाँच दिनदेखि निरन्तर खटिएर छोटो समयमै वैकल्पिक पुल तयार पारेको हो।
नयाँ पुल जडान भएसँगै भोलिदेखि पैदलयात्रीहरूका लागि आवतजावत खुला गरिने भएको छ भने पर्सिदेखि सवारी साधनहरू समेत सञ्चालनमा आउनेछन्। सेनाले द्रुत गतिमा पुल जडान गरेपछि लामो समयदेखि सास्ती खेपिरहेका स्थानीयवासी, व्यापारी तथा यात्रुहरूलाई ठूलो राहत मिलेको छ।
