कञ्चन । रुपन्देहीको कञ्चनमा सम्पन्न दोश्रो गौतमबुद्ध कप नाइन ए साइड फुटबल प्रतियोगिता २०८२ को उपाधि कञ्चन ३ को रेन्वो एकेडेमीले जितेको छ। गौतमबुद्ध सामुदायिक विकास केन्द्र, कञ्चन ५ पिपरीचापा रुपन्देहीको आयोजनामा भएको यस प्रतियोगितामा रेन्वो एकेडेमीले विश्वशान्ति युवा क्लबलाई ४-० गोल अन्तरले पराजित गर्दै उपाधि चुमेको हो।
उपाधिसँगै रेन्वो एकेडेमीले १ लाख ११ हजार १११ रुपैयाँसहित कप र मेडल प्राप्त गरेको छ। उपविजेता बनेको सैनामैना १० सालझण्डीको विश्वशान्ति युवा क्लबले भने ६६ हजार ६६६ रुपैयाँसहित कप र मेडलमा चित्त बुझाउन बाध्य भयो।
प्रतियोगितामा रेन्वो एकेडेमीका मिलन आले म्यान अफ द म्याच घोषित भए। यस्तै, उत्कृष्ट खेलाडीको उपाधि रेन्वो एकेडेमीका सूरज थारुले जिते भने उत्कृष्ट डिफेन्डर सुजित चौधरी र उत्कृष्ट गोलकिपर भीम पुन मगर पनि रेन्वो एकेडेमीबाटै रहेका थिए। सर्वाधिक गोलकर्ताको अवार्ड पनि १० गोल गरेका सूरज थारुले नै हात पारे।
विजेता तथा उपविजेता टिमलाई बधाई तथा पुरस्कार वितरण गर्दै लुम्बिनी प्रदेश सरकारका भौतिक पूर्वाधार विकास मन्त्री भूमिश्वर ढकालले युवाहरूलाई एकताबद्ध गरी समाजको सकारात्मक विकासमा लाग्न प्रेरित गरे। उनले पिपरीचापा खेलमैदानलाई व्यवस्थित बनाउन आगामी वर्ष पनि बजेटको व्यवस्था गर्ने प्रतिबद्धता जनाए।
कञ्चन गाउँपालिकाका उपाध्यक्ष मौसमी थापा मगरले खेलकुदले युवाहरूलाई विकृति, विसंगति र कुलतबाट टाढा राख्न महत्वपूर्ण भूमिका खेल्ने बताइन्। वडा नं. ५ का वडा अध्यक्ष कूलप्रसाद पौडेलले पनि खेलकुदले राष्ट्र र स्वास्थ्यका लागि मात्र नभई एकता, सहकार्य र सामूहिक कार्यको सोचमा परिवर्तन ल्याउन सक्ने विचार व्यक्त गरे। प्रतियोगितामा १६ फुटबल क्लबले प्रतिस्पर्धा गरेका थिए। कार्यक्रममा राष्ट्रिय लोक तथा दोहोरी गायक लालमाया थापा पुन र दीपक दर्लामीले सांगीतिक प्रस्तुति दिएका थिए।
