अर्घाखाँची । अर्घाखाँची जिल्लामा पेट्रोलियम पदार्थको कुनै पनि अभाव नरहेको जिल्ला प्रशासन कार्यालयले स्पष्ट पारेको छ । बजारमा पेट्रोल, डिजेल र खाना पकाउने ग्यास पर्याप्त मात्रामा उपलब्ध रहेको जनाउँदै प्रशासनले अनावश्यक हल्लाको पछि नलाग्न सर्वसाधारणलाई आग्रह गरेको छ ।
जिल्लाका सहायक प्रमुख जिल्ला अधिकारी झविलाल भट्टराईले बजारमा इन्धनको सहज आपूर्ति भइरहेको जानकारी दिँदै कृत्रिम अभाव सिर्जना गर्ने प्रयास भए सह्य नहुने चेतावनी दिएका छन् । पेट्रोलियम पदार्थ अभाव भएको बहाना बनाएर कालोबजारी गर्ने, तोकिएको भन्दा बढी मूल्य असुल्ने वा लुकाएर राख्ने जो–कोहीलाई पनि कानुनबमोजिम कडाभन्दा कडा कारबाही गरिने उनले स्पष्ट पारे ।
इन्धनमा कालोबजारी र अनियमितता हुन नदिन जिल्ला प्रशासन कार्यालयले बजार अनुगमनलाई थप प्रभावकारी र तीव्र बनाउने तयारीसमेत गरेको छ । कतैबाट कृत्रिम अभाव देखाएर ठगी गर्ने काम भएमा तत्काल प्रशासनलाई जानकारी गराउन आग्रह गर्दै सहायक प्रजिअ भट्टराईले उपभोक्तालाई नआत्तिन र घरमा अनावश्यक रूपमा इन्धन भण्डारण नगर्न अनुरोध गरेका छन् ।
