सिद्धार्थनगर । भारतको सिद्धार्थनगर जिल्लास्थित ४३ औँ वाहिनी सशस्त्र सीमा बल (एसएसबी) को खुनवा चेकपोस्ट टोलीले करिब ६.४७४ किलोग्राम चाँदीका गहनासहित एक जनालाई पक्राउ गरेको छ। विशेष सूचनाका आधारमा सीमा स्तम्भ सङ्ख्या ५५६ नजिकै खुनवा चेकपोस्टमा खटिएको प्रहरी टोलीले भारतबाट नेपालतर्फ पैदल आउँदै गरेका एक वृद्धलाई शङ्कास्पद अवस्थामा नियन्त्रणमा लिएको हो।
जाँचका क्रममा उहाँको साथबाट १८६ जोडी पायल र १ हजार ४४८ थान बिछिया गरी कुल ६.४७४ किलोग्राम चाँदीका गहना बरामद भएको छ। पक्राउ पर्नेमा उत्तर प्रदेशको सिद्धार्थनगर जिल्ला, शोहरतगढ थाना अन्तर्गत नीबी दोहनी गाउँका बासिन्दा रहेका छन्। प्रारम्भिक सोधपुछका क्रममा शोहरतगढमा व्यक्तिबाट सामान लिएर नेपालतर्फ पुर्याउन लाग्दा वैध कागजात पेस गर्न नसकेपछि बरामद गहनासहित उहाँलाई आवश्यक कारबाहीका लागि खुनवा भन्सार कार्यालयमा बुझाइएको छ।
