भैरहवा । भैरहवास्थित आन्तरिक राजस्व कार्यालयले चालू आर्थिक वर्ष २०८२/८३ को पहिलो चार महिनामा उत्साहजनक नतिजा निकाल्दै लक्ष्यभन्दा १ अर्ब १५ करोड ७८ लाख ५१ हजार रुपैयाँ बढी राजस्व सङ्कलन गरेको छ । कार्यालयले साउनदेखि कात्तिकसम्म ४ अर्ब २३ करोड ६८ लाख १४ हजारको लक्ष्य पाएकोमा ५ अर्ब ३९ करोड ४६ लाख ६५ हजार रुपैयाँ असुली गरी लक्ष्यको १२७.३ प्रतिशत प्रगति हासिल गरेको हो ।
प्रमुख कर अधिकृत प्रेमराज पोख्रेलका अनुसार यो सङ्कलन गत आर्थिक वर्षको तुलनामा ५१.५ प्रतिशतले बढी हो । कुल राजस्वमा अन्तःशुल्कको हिस्सा ८२.६ प्रतिशत रहेको छ भने मूल्य अभिवृद्धि कर र आयकरतर्फ पनि राम्रो असुली भएको छ । कार्यालयअन्तर्गत रहेका ६४ हजारभन्दा बढी करदाता, उद्योगी–व्यवसायी र कर प्रशासनको प्रभावकारी समन्वयका कारण प्रत्येक महिना लक्ष्यभन्दा बढी राजस्व सङ्कलन गर्न सम्भव भएको कार्यालयले जनाएको छ ।
