काठमाडौं । काठमाडौंको टोखामा आन्तरिक तथा बाह्य पर्यटन प्रवर्द्धनका लागि टोखा नेवाः सडक खाजा महोत्सव आयोजना गरिएको छ ।
टोखा नगरपालिका–२ र ३ को आयोजना तथा नेवाः गुठी र टोखा सांस्कृतिक संरक्षित क्षेत्र विकास समितिको व्यवस्थापनमा महोत्सव आयोजना गरिएको हो ।
सोही महोत्सवमा बसेकी होटल व्यवसायी सृष्टि डंगोलले खाजा महोत्सवमा नेवारी परिकारहरु राख्ने गरेको बताइन् ।
उनले भनिन्, ‘अहिले हाम्रो सडक खाजा महोत्सव भइरहेको छ । यो सुरु भएको चार हप्ता जति भयो, प्रत्येक हप्ताको शनिबार हुन्छ । यसमा हाम्रो नेवारी परिकारहरु राख्ने गरेका छौ ।’
टोखा गेटदेखि गणेशस्थान मन्दिरसम्म सडक खाजा महोत्सवका साथै विविध सांस्कृतिक कार्यक्रम आयोजना गरिएको छ । धार्मिक, सांस्कृतिक, ऐतिहासिक तथा पर्यटकीय दृष्टिकोणले धनी टोखामा स्थानीय महिलाहरुले बनाएका खानाका परिकार र उत्पादन गरेका हस्तकलाका सामग्री प्रदर्शनमा राखिएको छ ।
