नेपाल-भारत सीमावर्ती क्षेत्रबाट अवैध रूपमा भारततर्फ तस्करी गरी पुर्याइएको ठूलो परिमाणको चाइनिज लसुन भारतीय सीमा सुरक्षा बल (एसएसबी) ले नियन्त्रणमा लिएको छ। महराजगंज जिल्लाको निचलौल क्षेत्रस्थित सीमा स्तम्भ ४९७/१ नजिकै तिलबारी गाउँको खेतमा लुकाएर राखिएको ७२ बोरा चाइनिज लसुन एसएसबी २२ औँ बाहिनीको टोलीले बरामद गरेको हो। सहायक कमाण्डेन्ट सन्दीप सिंहको नेतृत्वमा खटिएको टोलीले विशेष सूचनाका आधारमा सो लसुन बरामद गरी आवश्यक कारबाहीका लागि निचलौल कस्टम कार्यालयमा बुझाएको छ।
नेपालका सीमा नाकामा २४ सै घण्टा सुरक्षा निकायको बाक्लो उपस्थिति र गस्ती रहँदा पनि यति ठूलो परिमाणमा चाइनिज लसुन सीमापारि पुगेपछि स्थानीय स्तरमा सुरक्षा व्यवस्थामाथि प्रश्न उठेको छ। नवलपरासीका सीमावर्ती नाकाहरूबाट पछिल्लो समय तस्करी फस्टाउँदै गएको र सीमापारि भारतीय सुरक्षा बलले समातेपछि मात्रै घटना सार्वजनिक हुने गरेको भन्दै स्थानीयवासीबीच यो विषय तीव्र चर्चाको विषय बनेको छ।
