काठमाडौँ । सरकारले नेपाल प्रिमियर लिग (एनपिएल) का आठवटै क्लबका लागि आगामी तीन महिनाभित्र फ्लडलाइट सहितका क्रिकेट रङ्गशाला निर्माण प्रक्रिया अघि बढाउने भएको छ । प्रधानमन्त्री वालेन्द्र शाहले सामाजिक सञ्जालमार्फत एनपिएलको छैटौँ संस्करणदेखि प्रतियोगिता ‘होम एन्ड अवे’ प्रणालीमा सञ्चालन गर्ने लक्ष्यसहित पूर्वाधार विकास मन्त्रालयमार्फत रङ्गशाला निर्माण गर्न लागिएको जानकारी दिनुभएको हो ।
उहाँका अनुसार सुदूरपश्चिम रोयल्सका लागि फाप्ला रङ्गशाला निर्माणको प्रक्रिया अघि बढिसकेको छ भने विराटनगर किङ्गस्का लागि बैजनाथपुर, लुम्बिनी लायन्सका लागि सिद्धार्थ, कर्णाली याक्सका लागि सुर्खेत, काठमाडौँ गुर्खाजका लागि कीर्तिपुर, पोखरा एभेन्जर्सका लागि पोखरा, जनकपुर बोल्ट्सका लागि रामजानकी र चितवन राइनोजका लागि गौतमबुद्ध क्रिकेट रङ्गशाला निर्माणको काम तीन महिनाभित्र सुरु गरिनेछ । क्रिकेटको व्यावसायिक विकास र विस्तारका लागि आवश्यक पूर्वाधार निर्माण गर्न सरकार प्रतिबद्ध रहेको प्रधानमन्त्री शाहले उल्लेख गर्नुभएको छ ।