काठमाडौँ । प्रहरी महानिरीक्षक डा. मनोज कुमार के.सी.को प्रमुख आतिथ्यमा ‘आधारभूत तहका प्रहरी कर्मचारीका लागि केन्द्रीय गुनासो व्यवस्थापन डेस्क’ को समुद्घाटन सम्पन्न भएको छ । नेपाल प्रहरीको क्लोज युजर ग्रुप (सियुजी) सेवामा आबद्ध आधारभूत तहका प्रहरी कार्यालय सहयोगीदेखि प्रहरी वरिष्ठ हवल्दारसम्मका ५४ हजार एक सय २२ जना प्रहरी कर्मचारीहरूको मोबाइलमा एकैसाथ गुनासो दर्ताका लागि गुगल फारमको लिङ्क पठाएर प्रहरी महानिरीक्षक के.सी.ले डेस्कको शुभारम्भ गर्नुभएको हो । सोही अवसरमा उहाँले एक जना प्रहरी कर्मचारीसँग टेलिफोनमार्फत प्रत्यक्ष संवाद गरी गुनासोसमेत सुन्नुभएको थियो ।
प्रहरी नियमावली, २०७१ को नियम १९६ बमोजिम कार्यादेश जारी गरी स्थापना गरिएको यस डेस्कको प्रमुख उद्देश्य सङ्गठनमा कार्यरत आधारभूत तहका प्रहरी कर्मचारीहरूको पेसागत तथा सेवागत जीवनलाई थप सुरक्षित, सम्मानित, मर्यादित र न्यायोचित बनाउनु रहेको छ । समारोहलाई सम्बोधन गर्दै प्रहरी महानिरीक्षक डा. के.सी.ले आधारभूत तहका प्रहरी कर्मचारीहरूले भोग्नुपरेका समस्या, कठिनाइ, असमान व्यवहार, विभेद तथा विविध गुनासाहरूको निष्पक्ष सुनुवाइ गरी समयमै उचित सम्बोधन गर्ने प्रभावकारी संयन्त्रका रूपमा कार्य गर्न डेस्कमा खटिएका प्रहरी अधिकारीहरूलाई निर्देशन दिनुभयो ।