काठमाडौँ । पूर्व–पश्चिम राजमार्गलाई चार लेनमा विस्तार गर्ने योजनाअन्तर्गत गोरुसिङ्गे–चन्द्रौटा सडक खण्डको ठेक्का सम्झौता सम्पन्न भएको छ । मन्त्री सुनिल लम्सालले सामाजिक सञ्जालमार्फत करिब रु चार अर्ब ५६ करोड लागतको उक्त आयोजना दुई वर्ष पाँच महिनाभित्र सम्पन्न गर्ने गरी ठेक्का सम्झौता गरिएको जानकारी दिनुभएको हो ।
कुल १९ दशमलव दुई किलोमिटर लामो यो सडक खण्ड सर्भिस लेनसहित छ लेनमा विस्तार हुनेछ । आयोजनाअन्तर्गत दुईवटा ठूला पुल, छ वटा साना पुल, ७२ वटा कल्भर्ट, पैदलयात्रीका लागि दुईवटा अन्डरपास, सवारीसाधनका लागि एउटा अन्डरपास र पैदलयात्रीका लागि एउटा आकाशे पुल निर्माण गरिने मन्त्री लम्सालले उल्लेख गर्नुभएको छ । साथै उक्त सडक खण्डमा वन्यजन्तुमैत्री संरचनासमेत निर्माण गरिने जनाइएको छ ।