लुम्बिनी ।आगामी प्रतिनिधिसभा निर्वाचनका लागि रुपन्देही निर्वाचन क्षेत्र नम्बर ५ बाट राष्ट्रिय स्वतन्त्र पार्टी (रास्वपा) का उम्मेदवार तौफिक अहमद खानले घरदैलो अभियानलाई तीव्र पारेका छन्। मतदाताका समस्या सुन्न र सुझाव संकलन गर्न गाउँ–टोल पुगेका उनले ५ वर्षभित्र यस क्षेत्रलाई लुम्बिनी प्रदेशकै सुविधायुक्त र व्यवस्थित बनाउने घोषणा गरेका छन् ।
कृषि, पर्यटन र व्यापारलाई मुख्य सम्भावना मानेका तौफिकले रोजगारी सृजना, सुशासन र पारदर्शितालाई आफ्नो प्राथमिकतामा राखेका छन्। घरदैलोका क्रममा स्थानीयले सडक,खानेपानी, शिक्षा र स्वास्थ्य सेवा सुधारको अपेक्षा राखेपछि उनले ती समस्या योजनाबद्ध रूपमा समाधान गर्ने प्रतिबद्धता जनाएका छन् ।
‘समृद्ध क्षेत्र नं. ५ को बलियो आधार’ नारासहित चुनावी मैदानमा रहेका उनले सडक पूर्वाधारलाई विशेष जोड दिएका छन्। जसअन्तर्गत हुलाकी राजमार्ग समयअगावै सम्पन्न गर्ने, लुम्बिनी–गैडहवा–रुद्रपुर–सैनामैना जोड्ने सडकलाई ४ लेनमा विस्तार गर्ने र ५ वर्षभित्र सबै मुख्य टोल–बस्तीका सडक कालोपत्रे वा आरसीसी गर्ने उनको प्रमुख योजना रहेको छ। विकास र इमान्दार नेतृत्वको खोजीमा रहेका मतदातामाझ उम्मेदवार घरदैलोमा पुगेसँगै यस क्षेत्रको चुनावी माहोल थप तातेको छ।
