चन्द्रनिगाहपुर । पूर्व–पश्चिम महेन्द्र राजमार्गअन्तर्गत रौतहटको गुजरा नगरपालिका–३ स्थित धनसार पुल नजिक शुक्रबार बिहान पेट्रोल बोकेको ट्याङ्कर दुर्घटना भई आगलागी भएको छ । बाराको अमलेखगञ्जबाट सर्लाहीतर्फ जाँदै गरेको मधेश प्रदेश ०३–००१ ख ७८११ नम्बरको ट्याङ्कर मृगलाई बचाउने क्रममा अनियन्त्रित भई सडकमा पल्टिँदा अचानक आगलागी भएको हो ।
चन्द्रपुर र निजगढ नगरपालिकाका दमकल तथा प्रहरी टोलीको सहयोगमा बिहान करिब ६ः५० बजे आगो पूर्ण रूपमा नियन्त्रणमा लिइएको थियो । आगलागीबाट ट्याङ्कर पूर्ण रूपमा क्षतिग्रस्त भए पनि दुर्घटनामा कुनै मानवीय क्षति भएको छैन । राजमार्गमा यातायात सञ्चालन सहज रहेको छ भने चालक बाराको सिमरा निवासी २५ वर्षीय समिर गुरुङलाई प्रहरीले नियन्त्रणमा लिएर घटनाबारे थप अनुसन्धान गरिरहेको छ ।
