काठमाडौँ । बराह बचत तथा ऋण सहकारी संस्थाको ५ अर्ब ८८ करोड रुपैयाँभन्दा बढी रकम हिनामिना प्रकरणका मुख्य योजनाकार शिव कुमार विश्वकर्मा (लामिछाने) लाई प्रहरीको केन्द्रीय अनुसन्धान ब्युरो (सीआईबी) ले पक्राउ गरेको गृहमन्त्री सुदन गुरुङले जानकारी दिनुभएको छ।
गृहमन्त्री गुरुङले सामाजिक सञ्जाल फेसबुकमार्फत उक्त जानकारी सार्वजनिक गर्दै पूर्वका बचतकर्ताहरूको पीडालाई सम्बोधन गर्न आफूले पदभार ग्रहण गरेकै दिनदेखि खोजी कार्यलाई तीव्रता दिएको उल्लेख गर्नुभएको छ। उहाँले करिब छ वर्षअघि धरानमा 'सेभ घोपा' अभियान सञ्चालनका क्रममा स्थानीय बचतकर्ताहरूका गुनासा सुनेको स्मरण गर्दै अभियन्ताका रूपमा तथा 'जेनजी आन्दोलन' पश्चात् तत्काल परिणाम दिन नसके पनि मन्त्रालयको जिम्मेवारी सम्हालेपछि कारबाही प्रक्रिया अघि बढाइएको बताउनुभएको छ।
फेसबुक पोस्टमार्फत गृहमन्त्री गुरुङले मुख्य योजनाकारलाई कानुनी दायरामा ल्याउन सफल भएको उल्लेख गर्दै उक्त ठगी प्रकरणमा संलग्न अन्य बाँकी दोषीहरूको खोजी तथा कारबाही प्रक्रियालाई पनि क्रमबद्ध रूपमा तीव्र पारिने स्पष्ट पार्नुभएको छ।