भैरहवा । रुपन्देही प्रहरीले वन मुद्दामा दश वर्षदेखि फरार सूचीमा रहेका सात जना प्रतिवादीहरुलाई एकसाथ पक्राउ गरेको छ । अदालतको फैसला कार्यान्वयनको सिलसिलमा प्रहरी चौकी खैरेनीबाट खटिएको टोलीले देवदह नगरपालिका–६ का सात जनालाई पक्राउ गरिएको जिल्ला प्रहरी कार्यालयका सूचना अधिकारी एवं डिएसपी मनोहर प्रसाद भट्टले जानकारी दिए ।
उनका अनुसार पक्राउ पर्नेहरुमा कमला रेश्मी, खुम बहादुर बाह्घरे, खुमा बाह्घरे, लाल कुमारी सिंजाली, कुमारी राना, लिला राना, सात बहादुर बाकबल रहेका छन् । यी सबै देवदह नगरपालिका वडा नम्बर ६ का हुन् ।
रुपन्देही जिल्ला अदालतले वन मुद्दामा ०७१ बैशाख ३ गते यी सबैलाई १८ दिन कैद सजाएको फैसला सुनाएको थियो । पक्राउ गरिएको सात जनालाई कैद सजाए भुक्तानका लागि अदालतमा पेश गरिएको जिल्ला प्रहरी कार्यालय रुपन्देहीले जनाएको छ ।
