गुल्मी। गुल्मी अस्पतालको सेवा यसै महिनाभित्र नवनिर्मित भवनबाट चरणबद्ध रूपमा सञ्चालनमा आउने भएको छ । मन्त्री सुनिल लम्सालले सामाजिक सञ्जाल फेसबुकमार्फत जानकारी दिँदै नवनिर्मित भवनमा सामान सार्ने कार्य सुरु गरिएको बताउनुभएको हो ।
मन्त्रालयको निरन्तर अनुगमनपछि अस्पताल सञ्चालनको अवस्थामा पुगेको उल्लेख गर्दै उहाँले प्रशासनिक, बहिरङ्ग (ओपीडी) र आकस्मिक लगायतका सबै सेवा नए भवनबाट क्रमशः सुरु गर्ने तयारी रहेको जानकारी दिनुभयो । यसअघि साउनको अन्तिम साता निरीक्षणका क्रममा अस्पताल भवन निर्माणमा ढिलाइ देखिएपछि ठेक्का रद्द गरी नयाँ टेन्डर प्रक्रिया अघि बढाउन निर्देशन दिइएको समेत मन्त्री लम्सालले स्मरण गराउनुभएको छ ।