जनकपुरधाम । धनुषा प्रहरीले कटुवा पेस्तोल र गोलीसहित एक महिलालाई नियन्त्रणमा लिएको छ। पक्राउ पर्नेमा सिरहाको कल्याणपुर नगरपालिका–५ निर्धना टोल बस्ने अन्दाजी ४० वर्षीया गङ्गावती महतो रहेकी छन् । विशेष सूचनाका आधारमा इलाका प्रहरी कार्यालय धनुषाधामबाट खटिएको प्रहरी टोलीले धनुषाधाम नगरपालिका–४ गौरीपुर टोलबाट उनलाई पक्राउ गरेको हो ।
कम्मरमा बाँधी लुकाइछिपाई लैजाँदै गरेको अवस्थामा एक थान कटुवा पेस्तोल र सोही पेस्तोलमा लाग्ने एक राउन्ड गोलीसहित महतोलाई नियन्त्रणमा लिइएको जिल्ला प्रहरी कार्यालय धनुषाका प्रवक्ता एवं प्रहरी नायब उपरीक्षक ओमप्रकाश खनालले जानकारी दिनुभयो।पक्राउ परेकी महतोमाथि प्रचलित कानुनबमोजिम आवश्यक कारबाही तथा थप अनुसन्धान भइरहेको प्रहरीले जनाएको छ।