अर्घाखाँची । अर्घाखाँचीको पाणिनी गाउँपालिका–८, पालीस्थित कमला माध्यमिक विद्यालयमा बिहीबार जिल्ला प्रशासन कार्यालयको आयोजनामा लागुऔषध नियन्त्रण तथा आत्महत्या न्युनिकरण सम्बन्धी सचेतनामूलक कार्यक्रम सम्पन्न भएको छ । विद्यार्थीहरूमा बढ्दो दुव्र्यसन र आत्महत्याका घटनालाई कम गर्ने उद्देश्यले आयोजित कार्यक्रममा प्रमुख जिल्ला अधिकारी तोय नारायण सुवेदीले समाज परिवर्तनका मुख्य आधार युवाहरू भएकाले उनीहरूलाई गलत कुलतबाट बच्न आग्रह गर्नुभयो ।
कार्यक्रममा जिल्ला प्रहरी प्रमुख डिएसपी दिवस जिसीले लागुऔषधको कानुनी कारबाही र सामाजिक असरबारे जानकारी गराउनुभयो भने सशस्त्र प्रहरी नायव उपरीक्षक योगराज दाहाल र विद्यालयका प्रधानाध्यापक गोविन्द पन्थीले विद्यार्थीमार्फत समाजमा सकारात्मक सन्देश फैलाउन सकिने धारणा राख्नुभयो । राष्ट्रिय अनुसन्धानका डिएसपी, वडा अध्यक्ष, विद्यालय व्यवस्थापन समिति अध्यक्ष लगायतको उपस्थिति रहेको उक्त कार्यक्रममा वक्ताहरूले विकृति विरुद्ध एकजुट हुन जोड दिएका थिए ।
