काठमाडौँ । प्रधानमन्त्री वालेन्द्र शाहले नेपाली उत्पादनको अन्तर्राष्ट्रिय बजार विस्तारका लागि उद्यमी–व्यवसायीका जायज माग सम्बोधन गर्न सरकार पूर्ण रूपमा प्रतिबद्ध रहेको स्पष्ट पार्नुभएको छ । प्रधानमन्त्री तथा मन्त्रिपरिषद्को कार्यालयमा आज निर्यातजन्य उद्योग–व्यवसायमा आबद्ध सङ्घ–संस्थाका प्रतिनिधिसँग भएको छलफलमा उहाँले सो कुरा बताउनुभएको हो ।
छलफलका क्रममा गलैँचा निकासीकर्ताको माग बमोजिम अमेरिकामा परेको निर्यात समस्या समाधानका लागि परराष्ट्र मन्त्रालयमार्फत कूटनीतिक नोट पठाउन र कच्चा पदार्थ ऊनको ‘क्वरेन्टिन सर्टिफिकेसन’ हप्ताको दुई दिन मिलाउन प्रधानमन्त्रीले सम्बन्धित निकायलाई निर्देशन दिनुभयो ।
यस्तै, सस्तो भन्सार दरमा भारततर्फ भइरहेको काठको कच्चा पदार्थ निर्यातलाई भन्सार शुल्क बढाएर निरुत्साहित गरिने र हिमाली क्षेत्रमा भेडापालनका लागि वन ऐन परिमार्जन गरिने आश्वासन उहाँले दिनुभयो । नेपाल प्लाइउड, गलैँचा, पश्मिना र डग च्यु उत्पादक सङ्घका अध्यक्षहरूले आ–आफ्ना क्षेत्रका समस्या र माग प्रस्तुत गर्नुभएको उक्त भेटमा प्रधानमन्त्री शाहले आन्तरिक उत्पादन प्रोत्साहन तथा निर्यात प्रवर्धनका लागि सरकारले आवश्यक सहयोग र नीतिगत सुधार गर्ने प्रतिबद्धता व्यक्त गर्नुभयो ।
