भैरहवा । रुपन्देही प्रहरीले लुम्बिनी सांस्कृतिक नगरपालिकाबाट ६ किलोग्राम अवैध लागुऔषध गाँजासहित एक जनालाई पक्राउ गरेको छ । विशेष सूचनाको आधारमा खटिएको प्रहरी टोलीले लागुऔषधसहित ४३ वर्षीय प्रशुराम लोधलाई पक्राउ गरेको हो ।
जिल्ला प्रहरी कार्यालय, रुपन्देहीका सूचना अधिकारी तथा प्रहरी नायव उपरीक्षक सुरज कार्कीका अनुसार, इलाका प्रहरी कार्यालय, लुम्बिनीबाट खटिएको टोलीले लोधको घरमा छापा मारेको थियो । घरमा अवैध लागुऔषध लुकाइछिपाइ राखेको सूचना पाएपछि प्रहरीले खानतलासी गर्दा उक्त परिमाणको गाँजा बरामद भएको हो । लुम्बिनी सांस्कृतिक नगरपालिका वडा नं. १२, भबईस्थित आफ्नै घरबाट पक्राउ परेका लोधलाई नियन्त्रणमा लिई थप अनुसन्धान कार्य अगाडि बढाइएको प्रहरीले जनाएको छ ।
