मकवानपुर । मकवानपुरको थाहा नगरपालिकामा गोरेटो बाटोबाट लडेर एक जना वृद्धको मृत्यु भएको छ। थाहा नगरपालिका-६, बज्रबाराहीको पोखरीडाँडास्थित गोरेटो बाटोबाट लडेर नगरपालिका-१ कुन्छालका ६२ वर्षीय कृष्ण गोपालीको मृत्यु भएको हो।
प्रहरीका अनुसार, मृतक गोपाली आफ्नो घरदेखि करिब २ किलोमिटर दक्षिणमा रहेको गोठमा बस्दै आएका थिए। बिहीबार बिहान उनी बज्रबाराही बजारमा दूध बेचेर आफ्नो गोठतर्फ फर्कँदै थिए। सोही क्रममा पोखरीडाँडाको गोरेटो बाटोबाट चिप्लिएर उनी करिब १० मिटर तल खसेका थिए। शरीरका विभिन्न भागमा गम्भीर चोट लागेका कारण उनको घटनास्थलमै मृत्यु भएको प्रारम्भिक अनुसन्धानबाट खुलेको छ।
स्थानीयले बिहान करिब ८:३० बजे गोरेटो बाटोमुनि एक व्यक्ति मृत अवस्थामा देखेपछि प्रहरीलाई खबर गरेका थिए। खबर पाउनासाथ प्रहरी टोली घटनास्थलमा पुगेको थियो। घटनाको अनुसन्धानका लागि इलाका प्रहरी कार्यालय, पालुङबाट प्रहरी निरीक्षक सविन बाबु अर्यालको नेतृत्वमा विशेष अनुसन्धान टोली परिचालन गरिएको जिल्ला प्रहरी कार्यालय मकवानपुरले जनाएको छ। प्रहरीले घटनाबारे थप अनुसन्धान गरिरहेको छ।
