काठमाडौं । नेपाल रेडक्रस सोसाइटीले आफूलाई अन्तर्राष्ट्रिय रेडक्रसको मान्यता नरहेको भन्ने खबरको खण्डन गरेको छ । सोसाइटीका महासचिव भूपतिलाल श्रेष्ठले विज्ञप्ति निकालेर रेडक्रस तथा रेडक्रिसेन्ट सोसाइटीहरूको अन्तर्राष्ट्रिय महासंघको सदस्यता र अन्तर्राष्ट्रिय मान्यता नेपाल रेडक्रस सोसाइटीले ६० वर्ष पहिले नै प्राप्त गरेको र पछिल्लो समयमा यसमा थप कुनै निर्णय र फेरबदल नभएको भन्दै गलत प्रचारको खण्डन गरेका छन् ।
‘रेडक्रस तथा रेडक्रिसेन्ट सोसाइटीहरूको अन्तर्राष्ट्रिय महासंघको सदस्यता र अन्तर्राष्ट्रिय मान्यता नेरेसोले ६० वर्ष पहिले नै प्राप्त गरेकोे छ र पछिल्लो समयमा यस सम्बन्धमा समाचारमा भनिए बमोजिम थप कुनै निर्णय नभएको र फेरबदल नभएको व्यहोरा जानकारी गराउँदछौं,’ श्रेष्ठले विज्ञप्तिमार्फत् भनेका छन् ।
उनले गत साउन २ गते नै प्राध्यापक सुदर्शनप्रसाद नेपालको नेतृत्वमा निर्वाचित समितिले नेरेसोको नियमित गतिविधि गर्दै आइरहेको दाबी गरेका छन् । ‘सोसाइटीले आफ्नो सबै बैधानिक दायित्व पूरा गर्ने सन्दर्भमा लेखापरीक्षण, वार्षिक साधारण सभा, समाजकल्याण परिषद्को आवद्धता नवीकरण, वैदेशिक सहायताको स्वीकृति, स्थानीय तहको सिफारिस र संस्था नवीकरणको लागि पूरा गर्नुपर्ने सबै कानुनी प्रकृया पूरा गरी संस्था दर्ता नवीकरण भइसकेको छ,’ उनले भने ।
महामन्त्री श्रेष्ठले रेडक्रसको अन्तर्राष्ट्रिय महासंघको कार्यालयले सोसाइटीको मान्यता, आवद्धता सम्बन्धी विषय आफ्नो कार्य क्षेत्रभित्र नपर्ने नेरेसोलाई स्पष्ट पारेको व्यहोरा समेत आग्रह गरेका छन् ।
