भैरहवा । रुपन्देही प्रहरीले भन्सार छलेर भित्र्याइएको ८ किलो चाँदीसहित ७ तोला सुनका गहना बरामद गरेको छ । रुपन्देही प्रहरी प्रमुख एसपी रञ्जितसिंह राठौंरका अनुसार इलाका प्रहरी कार्यालय, धकधईबाट खटिएको टोलीले रोहिणी गाउँपालिका–७ बाट उक्त परिमाणका विभिन्न गहना बरामद गरेको हो ।
प्रहरीले ७ तोला १० लाल ७ प्वाइन्ट सुनका गहना, साठे ८ किलो चाँदीका विभिन्न गहना र पित्तल जस्तो पहेंलो धातुबाट बनेका गहना बरामद गरेको छ । प्रारम्भिक अनुसन्धानबाट भारतमा गहना बनाएर नेपाल भित्र्याइएको आशंकामा छानबीन अगाडि बढाइएको उनले बताए ।
राठौंरका अनुसार युपी५६एडी ८०३६ नम्बरको मोटरसाइकलसहित भारतको महाराजगन्ज जिल्ला नौतनुवास्थित कुरहवाका उपेन्द्र वर्मालाई समेत नियन्त्रणमा लिइएको छ । उनको मोटरसाइकल जाँच गर्नेक्रममा उनका साथबाट चाँदी र गरगहना बरामद भएका थिए ।
प्रहरीले पक्राउ गरेका मोटरसाइकल चालक र उनीबाट बरामद सामग्रीलाई आवश्यक कारबाहीका लागि भैरहवा भन्सार कार्यालय बुझाएको जनाएको छ ।
