भैरहवा । रुपन्देहीको रोहिणी गाउँपालिकामा कार्यपालिका बैठकमै कुटाकुट भए पछि राजनैतिक दलका नेताहरुले पालिका बैठकलाई प्रत्यक्ष प्रसारण गर्नुपर्ने सहितका माग राख्दै गाउँपालिकाका प्रमुख प्रशासकिय अधिकृतलाई ज्ञापन पत्र बुझाएका छन् ।
ज्ञापन पत्रमा धकधई स्वास्थ्य चौकीमा एमबिबियस डाक्टरको माग राख्दै निशुल्क पाईने औषधी पनि वितरण गर्न आग्रह गरेको छ । लामो समय देखि सञ्चालनमा नरहेको स्वास्थ्य चौकीका एक्सरे मेशीन र भिडियो एक्सरे मेशनि पनि सञ्चालनको माग ज्ञापन पत्रमा उल्लेख रहेको छ ।
यसै गरि रोहिणी गाउँ शिक्षा ऐन २०७४ को संघिय शिक्षा ऐन संग बाझिएको हुदा संसोधित गाउ शिक्षा ऐन अनुसार हुनुपर्उँने माग गरिएको छ । संघिय शिक्षा ऐनमा शिक्षा समितिको म्याद २ वर्ष र गाउ शिक्षा ऐनमा ३ वर्ष भएकोमा अहिले गाउ शिक्षा ऐनमा पनि यसको म्याद २ वर्ष नै राखिएको छ । हाल गाउ शिक्षा ऐन अनुसार शिक्षा समिति स्वत: खारेज भएकोले यसको पुनर्गठन हुनुपर्ने माग समेत स्थानिय नेताहरुले उठाएका छन् । रोहिणी गाउँपालिकामा शिक्षक काज सरुवा कार्यविधि लागु भए पनि कार्यविधि विपरीत विद्यालयमा काज सरुवा गरेर प्रधानअध्यापकको जिम्मेवारी दिएको बताउदै कार्यविधि अनुसार नै गर्नुपर्ने माग अघि सारिएको छ ।
राष्ट्रिय प्रजातन्त्र पार्टीका केन्द्रिय सहायक महामन्त्री ताहिर अली, रोहिणी गाउँपालिकाका पूर्व अध्यक्ष सनोज कुमार यादव, नेकपा एमालेका जिल्ला सदस्य प्रदिप कुमार पाण्डे, नेपाली कांग्रेसका क्षेत्रिय सचिव बैजनाथ साहनी, नेपाली कांग्रेसका रोहिणी सभापति पारसनाथ योगी, एकिकृत समाजवादीका शिरेन्द्र कुर्मी, जनमत पार्टीका विष्णु चौधरी, रास्वपाका रोहिणी सभापति कृष्ण चन्द्र मिश्र, जनता समाजवादीका पार्टीका जय प्रकाश यादव र स्थानिय शतिश चन्द्र मिश्रले संयुक्त हस्ताक्षर गरि पालिकाका प्रमुख प्रशासकिय अधिकृतलाई ज्ञापन बुझाएका हुन् ।
