बुटवल । नेपाल कम्युनिस्ट आन्दोलनका संस्थापक पुष्पलाल श्रेष्ठको ४८ औं स्मृति दिवसका अवसरमा आयोजित कार्यक्रमका वक्ताहरूले कम्युनिस्ट आन्दोलनलाई पुनः सुदृढ बनाउन आत्मसमीक्षा, सहकार्य र वैचारिक पुनर्जागरण आवश्यक रहेको बताएका छन्। पुष्पलालको त्याग, समर्पण र नैतिक राजनीतिक संस्कृतिलाई व्यवहारमा उतार्न नसक्दा आन्दोलन कमजोर बन्दै गएको उनीहरूको भनाइ थियो।
बुटवलमा आयोजित ‘पुष्पलालको राजनीतिक विचार र नेपाली वाम राजनीतिको भावी कार्यदिशा’ विषयक बहसमा नेकपा (एमाले)का केन्द्रीय सचिव छविलाल विश्वकर्माले पुष्पलाल कम्युनिस्ट एकताका सूत्रधार भएको उल्लेख गर्दै पार्टीहरूले कमजोरीको गम्भीर समीक्षा गर्नुपर्ने बताउनुभयो। सोही कार्यक्रममा एमाले रुपन्देही इञ्चार्ज खिमलाल भट्टराईले श्रमजीवी र विपन्न वर्गको हितलाई केन्द्रमा राखेर अघि बढ्नुपर्नेमा जोड दिनुभयो।
त्यसैगरी नेपाल कम्युनिस्ट पार्टीका रुपन्देही इञ्चार्ज निर्मल जिसी र नेकपा (माओवादी)का नेता वीरेन्द्र विकले सत्ता स्वार्थ, भ्रष्टाचार र अवसरवादबाट मुक्त भई देश र जनताको समृद्धिका लागि वामपन्थी शक्तिहरूबीच सहकार्य हुनुपर्ने धारणा राख्नुभयो। अध्येता माधव पौडेलले कार्यपत्र प्रस्तुत गर्नुभएको उक्त कार्यक्रम एमाले रुपन्देहीका अध्यक्ष यज्ञ गैरेको अध्यक्षतामा सम्पन्न भएको थियो।
