भैरहवा । नेपाल ट्रेड युनियन महासंघ (जिफन्ट) का केन्द्रीय उपाध्यक्ष तथा मजदुर नेता कमल गौतमको निधनले सिद्धार्थ उद्योग वाणिज्य संघ, रुपन्देही स्तब्ध भएको छ । बिहीबार संघको अगुवाइमा भैरहवाका उद्योगहरुको विद्युत कटौतीविरुद्धको आन्दोलनलाई सम्बोधन गरिरहेकै अवस्थामा गौतमको निधन भएको थियो ।
संघले एक विज्ञप्ति जारी गर्दै गौतमको निधनप्रति गहिरो दुःख व्यक्त गरेको छ र यसले संघ परिवारलाई अत्यन्तै मर्माहित बनाएको जनाएको छ । सिद्धार्थ उद्योग वाणिज्य संघका अध्यक्ष नेत्र प्रसाद आचार्यले स्वर्गीय गौतमप्रति हार्दिक श्रद्धाञ्जली अर्पण गर्दै शोकसन्तप्त परिवारजनप्रति गहिरो समवेदना व्यक्त गरेका छन् । स्वर्गीय गौतमको सम्मानमा कार्तिक १४ गते शुक्रबार सिद्धार्थ उद्योग वाणिज्य संघ, रुपन्देहीको सचिवालय बन्द रहने निर्णय गरिएको अध्यक्ष आचार्यले जानकारी दिए ।
