अर्घाखाँची । राष्ट्रिय जनमोर्चाका लुम्बिनी प्रदेश अध्यक्ष बोम बहादुर खत्रीले लिम्पियाधुरा, कालापानी र लिपुलेक नेपालकै भूमि भएकोमा जोड दिँदै यसमा छिमेकी राष्ट्रहरूको हस्तक्षेप दुर्भाग्यपूर्ण भएको बताउनुभएको छ।
आज सदरमुकाममा आयोजित पत्रकार सम्मेलनमा बोल्दै खत्रीले उक्त भूमि नेपालको अविभाज्य अंग भएको र यसमा भारत र चीनले हस्तक्षेप गर्न नहुने बताउनुभयो। उहाँले आफ्नो भूमि फिर्ता ल्याउन कूटनीतिक पहल मात्र पर्याप्त नभएको भन्दै अब राष्ट्रप्रेमी जनताले अन्तर्राष्ट्रिय अदालतमा मुद्दा हाल्नुपर्ने बताउनुभयो।
कार्यक्रममा राष्ट्रिय जनमोर्चाका केन्द्रीय सदस्य झविलाल थापा, यमलाल पोखेल लगायतका केन्द्र तथा प्रदेशका नेताहरूको उपस्थिति रहेको थियो। राष्ट्रिय जनमोर्चाका अध्यक्ष थम्मन केसीको अध्यक्षता, सचिव बाबुराम पन्थी सुनारको सञ्चालन र उपाध्यक्ष गोपाल पौडेलको स्वागत मन्तव्यमा सम्पन्न उक्त कार्यक्रममा जिल्लामा क्रियाशील सञ्चारकर्मीहरूको उल्लेखनीय सहभागिता थियो।
