सन्धिखर्क, अर्घाखाँची । अर्घाखाँचीको सन्धिखर्क नगरपालिका वडा नम्बर ७ ले किसानको आयस्तर वृद्धि गर्न र उनीहरूलाई आत्मनिर्भर बनाउने उद्देश्यका साथ बेमौसमी तरकारीको बीउ वितरण गरेको छ। वडा अध्यक्ष चुरा बहादुर केसीले किसानलाई व्यावसायिक तरकारी खेतीमा लाग्न प्रोत्साहन गर्दै आवश्यक सहयोग गर्ने प्रतिबद्धता व्यक्त गरे।
वडाले आज र भोलि गरी दुई दिनसम्म आफ्नो वडा भित्रका किसानलाई प्याज, केराउ लगायतका विभिन्न तरकारीको बीउ ५० प्रतिशत अनुदानमा उपलब्ध गराउने वडा सचिव सीता बिसी पराजुलीले जानकारी दिइन् ।
कार्यक्रममा वडा सदस्य डुकलाल पोखेल, मीना ज्ञवाली, पुष्पा नेपालीका साथै कृषि प्राविधिक प्रदीप आचार्य र सब इन्जिनियर मेघराज पोखेल लगायतको उपस्थिति थियो। वडा अध्यक्ष केसीले किसानलाई उत्पादन वृद्धि गर्न र व्यावसायिक बन्न आग्रह गर्दै, यसबाट उनीहरूको जीवनस्तरमा सुधार आउने विश्वास व्यक्त गरे।
