अर्घाखाँची । प्रसिद्ध धार्मिक स्थल सुपादेउराली मन्दिरको आर्थिक पारदर्शिता र व्यवस्थापनको विषयलाई लिएर सन्धिखर्क नगरपालिका र वडाध्यक्षबीच विवाद चर्किएको छ । मन्दिरको आर्थिक पाटोमा प्रश्न उठेको र संरक्षण समिति नरहेको भन्दै सन्धिखर्क नगरपालिकाका नगर प्रमुख कृष्ण प्रसाद श्रेष्ठले १ गतेदेखि लागु हुने गरी ५ बुँदे कडा निर्देशन जारी गर्नुभएको छ । नगरपालिकाको निर्देशन अनुसार अबदेखि मन्दिरमा चढाइने बलिको टाउको भक्तजनलाई नै निःशुल्क फिर्ता दिनुपर्नेछ ।
यस्तै, भेटी व्यवस्थापनलाई पारदर्शी बनाउन प्रहरी, जनप्रतिनिधि र स्थानीयको रोहबरमा सीसीटीभीको निगरानीमा रकम गनेर बैंक दाखिला गर्न र दैनिक आम्दानी सामाजिक सञ्जालमार्फत सार्वजनिक गर्न निर्देशन दिइएको छ । समिति गठन नहुँदासम्म कर्मचारीको तलब रोक्का राख्न र मन्दिरमा नयाँ आर्थिक भार पर्ने काम नगर्न पनि नगरपालिकाले सचेत गराएको छ ।
यता, सन्धिखर्क नगरपालिका वडा नम्बर ७ का अध्यक्ष चुरा बहादुर केसीले भने नगरपालिकाको यो कदमको कडा विरोध गरेका छन् । सामाजिक सञ्जाल फेसबुकमा आक्रोश पोख्दै उनले विधान विपरीत गरिएको हस्तक्षेप मान्य नहुने चेतावनी दिएका छन् । अध्यक्ष केसीले नेतृत्व बाहिर भएको मौका छोपेर नगरपालिकाले 'टपरी' जस्तो पत्र पठाएको र मन्दिरको परम्परामाथि प्रतिबन्ध लगाउन खोजेको आरोप लगाएका छन् । उनले नगरपालिकाको 'हुकुमी शैली' र हस्तक्षेपकारी निर्णय असफल हुने जिकिर गरेका छन् ।
