भैरहवा । भैरहवा भन्सार कार्यालयले आगजनीबाट ध्वस्त भएका संरचनाका बाबजुद पनि अत्यावश्यक सामग्रीहरू आयात गर्न सुरु गरेको छ। जिल्ला सुरक्षा समितिको निर्णयपछि ग्यास, डिजेल, पेट्रोल, औषधि, तरकारी लगायतका सामग्री भित्रिएका छन् ।
भन्सार कार्यालयका प्रमुख शिवलाल न्यौपानेका अनुसार विद्युत् सेवा अवरुद्ध भए पनि नेपाल विद्युत् प्राधिकरणको सहयोगमा आंशिक रूपमा कार्यालय सञ्चालन गरिएको छ। हाललाई सामान्य काउन्टरबाट अत्यावश्यक वस्तुहरूको जाँचपास भइरहेको छ।
बिहीबार ४ वटा ग्यास बुलेट र २१ वटा फलफूल, तरकारी तथा खाद्यान्न बोकेका गाडीहरू भन्सार पास भएका छन् । यसैबीच, रुपन्देहीका प्रमुख जिल्ला अधिकारी डा. टोकराज पाण्डेले ढुक्क भएर व्यापार व्यवसाय सञ्चालन गर्न आह्वान गरेका छन् । उनले आगजनी, लुटपाट र तोडफोडमा संलग्न व्यक्तिहरूलाई कारबाही प्रक्रिया अगाडि बढाइएको र अराजक गतिविधि गर्नेहरूमाथि बल प्रयोग गरिने चेतावनी दिएका छन्।
