रुपन्देहीमा शान्ति सुरक्षा सुदृढ गर्न एआईजी दाहालको निर्देशन, सीमा व्यवस्थापनमा जोड

भैरहवा । सशस्त्र प्रहरी बल नेपालका अतिरिक्त महानिरीक्षक (एआईजी) वंशीराज दाहालले रुपन्देही जिल्लाको निर्वाचन सुरक्षाको जानकारी लिएका छन् । आगामी फागुन २१ गते हुने प्रतिनिधि सभा सदस्य निर्वाचनलाई लक्षित गर्दै सशस्त्र प्रहरी बल नेपालका अतिरिक्त महानिरीक्षक (एआईजी) दाहालले महाकाली–मेची यात्राका क्रममा रुपन्देहीको शान्ति सुरक्षाको अवस्थाबारे जानकारी लिएका हुन् ।

उनले भैरहवास्थित सशस्त्र प्रहरी बल नेपाल नम्बर २७ गण हेडक्वार्टर रुपन्देहीमा कमाण्डर तथा कार्यरत सशस्त्र प्रहरी अधिकृतहरूसँग भेटेर छलफल तथा परामर्श गर्दै शान्ति सुरक्षा भरपर्दो र प्रभावकारी बनाउन निर्देशन दिएका छन् । गणका गणपति सशस्त्र प्रहरी उपरीक्षक (एसपी) नवराज बोहराले रुपन्देहीको समग्र सुरक्षा अवस्था, सीमा क्षेत्रको संवेदनशीलता, निर्वाचनमा सशस्त्र प्रहरी बलको तैनाथी योजना तथा सुरक्षा चुनौतीहरूबारे विस्तृत जानकारी गराएका थिए ।

एआईजी दाहालले निर्वाचन सुरक्षाको अवस्था तथा चुनौतीहरूबारे जानकारी गराउँदै निर्वाचनको समयमा आइपर्न सक्ने सम्भावित चुनौतीहरूको तत्काल समाधान, सुरक्षाकर्मीको प्रभावकारी परिचालन, सीमा निगरानी र शान्ति सुरक्षा व्यवस्थापनका सम्बन्धमा प्रशिक्षण सहितको निर्देशन दिएका थिए । उनले जिल्ला सुरक्षा समितिका पदाधिकारीहरू, भन्सार तथा राजस्व कार्यालयका प्रमुखहरूसँग समेत भेटघाट गर्दै शान्ति सुरक्षा, निर्वाचन सुरक्षा, सीमा व्यवस्थापन, अवैध ओसार–पसार नियन्त्रण तथा राजस्व संरक्षणका विषयमा छलफल गरेका थिए ।