नवलपरासी । नवलपरासीमा वर्षेनी दर्ता हुने आपराधिक मुद्दाको संख्या निरन्तर बढ्दै गएको छ । जिल्ला प्रहरी कार्यालयले सार्वजनिक गरेको पछिल्लो तीन आर्थिक वर्षको विवरण अनुसार अपराधका घटनासँगै मुद्दा दर्ता हुने क्रममा उल्लेख्य वृद्धि भएको हो । कार्यालयका अनुसार आर्थिक वर्ष २०८०/८१ मा चार सय ६८ वटा मुद्दा दर्ता भएकोमा आव २०८१/८२ मा पाँच सय ६५ र आव २०८२/८३ मा बढेर छ सय ६२ पुगेको छ ।
यस अवधिमा मुद्दा दर्ता दर करिब ४२ प्रतिशतले बढेको प्रहरीले जनाएको छ । सोही अवधिमा क्रमशः चार सय ६५, तीन सय ६८ र चार सय ५० वटा मुद्दा फछ्र्योट भएका छन् भने अनुसन्धानको क्रममा रहेका मुद्दाको संख्या पनि बढेर आव २०८२/८३ मा दुई सय १२ पुगेको छ ।
यस्तै फरार प्रतिवादी पक्राउ अभियान अन्तर्गत आर्थिक वर्ष २०८०/८१ मा दुई सय ५८, आव २०८१/८२ मा तीन सय ७९ र आव २०८२/८३ मा चार सय ५२ जना प्रतिवादी पक्राउ परेका छन् । प्रहरी उपरीक्षक रामबहादुर केसीले अपराधको प्रकृति जटिल बन्दै गएको र सीमित जनशक्तिका बाबजुद अनुसन्धान तथा सेवा प्रवाहलाई निरन्तरता दिइएको जानकारी दिनुभयो ।
अपराध न्यूनीकरणका लागि समुदाय–प्रहरी साझेदारी, लागूऔषध विरुद्धको अभियान र साइबर अपराध सचेतना जस्ता कार्यक्रम सञ्चालन गरिएको बताउँदै उहाँले यसमा नागरिक समाज, स्थानीय तह र अभिभावकको सहकार्य आवश्यक रहेको उल्लेख गर्नुभयो । प्रहरीले गत आर्थिक वर्षमा मात्रै सात हजार आठ सय ६१ जना नागरिकलाई विभिन्न प्रहरी सेवा प्रदान गरेको जनाएको छ ।
