मोहन पौडेल
परासी । डिभिजन वन कार्यालय पश्चिम नवलपरासीका प्रमुख(डिएफओ) जीवन पंगेनी माथी महिलालाई दुव्र्यहार गरेको आरोप लागेको छ । सामुदायिक वनको कामका लागि डिभिजन वन कार्यालयमा पुगेका दुई जना अभियान्ता महिलाहरुलाई कार्यालय प्रमुख पंगेनीले आफ्नै कार्यकक्षमा अश्लिल शब्द प्रयोग गर्दै दुव्यर्वहार गरेको बताईएको छ ।
सामुदायिक वनका अभियान्ताहरु माथी वन कार्यालयका प्रमुखले नै हिंसात्मक दुव्यर्वहार गरेको भन्दै सामुदायिक वन उपभोक्ता महासंघ(फेकोफन) नवलपरासीले कारवाही गर्न माग गरेको छ । फेकोपनले आज प्रमुख जिल्ला अधिकारी स्किम श्रेष्ठलाई न्यायको लागि निवेदन बुझाउँदै डिएफओ पंगेनीलाई तत्काल कानूनी कारवाहीमा ल्याउन र पीडितलाई न्याय दिलाउन माग गरेको हो ।
फेकोफनका जिल्ला अध्यक्ष शारदा पोखरेल, केन्द्रिय सदस्य कमल परियार, प्रदेश सदस्य नारायण पाण्डेसहित विभिन्न सामुदायिक वनका अभियान्ताहरु जिल्ला प्रशासन कार्यालय पुगेर प्रमुख जिल्ला अधिकारीको ध्यानाकर्षण गराउनुभएको हो ।
डिएफओ पंगेनीले आदर्श सामुदायिक वन उपभोक्ता समूह सुनवल ४ की सचिव तेजकुमारी क्षेत्रीलाई गत मंसिर ९ गते र स्थानीय सामुदायिक वन उपभोक्ता महासंघ सरावलकी उपाध्यक्ष रानी कँवरलाई पुस ११ गते आफ्नै कार्यकक्षमा फाईलमा तोक लगाउन जाँदा जथाभावी गाली,अपशब्द तथा महिला हिंसात्मक बोली बोलेर दुव्र्यवहार गरेको फेकोपनले प्रमुख जिल्ला अधिकारीलाई बुझाएको निवेदनमा उल्लेख छ । प्रजिअ श्रेष्ठले दुवै पक्षको कुरा सुनेर मात्र आवश्यक कदम चाल्ने बताउनुभयो ।
डिएफओ पंगेनीले भने आफूले कसैलाई पनि दुव्र्यहार नगरेको बताउनुभएको छ । “सामुदायिक वन भित्र मन्दिर निर्माण गर्न दिनुपर्यो भने आउनुभएको थियो, मैले कानूनले मिल्दैन भनेर पठाएको हुँ,त्यसैलाई अतिरञ्जित गरिएछ, कार्यालयमा आउने सेवाग्राहीलाई मैले किन दुव्र्यहार गँर्थे र ?”, उहाँले भन्नुभयो ।
