भैरहवा । रुपन्देहीको सिद्धार्थनगर नगरपालिकाको कार्यालयले नगर स्थापना दिवस मनाउने भएको छ । कार्यालयले माघ २२ गते सोमबार विभिन्न कार्यक्रम आयोजना गरी स्थापना दिवस मनाउने भएको हो ।
वि.स.२०२४ माघ २२ गते भैरहवा नगर पञ्चायतको रुपमा हालको सिद्धार्थनगर नगरपालिका स्थापना भएको थियो । स्थापना भएदेखि कार्यालयले पहिलो पटक स्थापना दिवस मनाउन लागेको हो ।
‘माघ २२ गते हामी सबै नगरवासीहरुको लागि ऐतिहासिक दिन हो’ उनले भने, ‘त्यसैले उक्त दिन विभिन्न कार्यक्रम गरी हर्षोउल्लासका साथ मनाउने र मनाउनका लागि नगरवासीहरुमा आग्रह समेत गर्दछौँ ।’
स्थापना दिवसको अवसरमा नगरमा प्रभातफेरी, शुभकामना आदानप्रदान, दीप प्रज्वलन लगायत कार्यक्रम गरी मनाइने सिद्धार्थनगर नगरपालिका वडा नम्बर ५ का वडाअध्यक्ष एवं कार्यक्रम संयोजक पुरनप्रसाद श्रेष्ठले जानकारी दिए ।
सोमबार बिहान प्रभातफेरी, साँझ दीप प्रज्वलन लगायत कार्यक्रममा सहभागिताका लागि नगरपालिकाको कार्यालयले विभिन्न संघसंस्था लगायत नगरवासीहरुलाई आग्रह गरेको छ । त्यस्तै दिवसको अवसरमा कार्यालयले टोल, घर, संघसंस्था लगायतको कार्यालयहरुमा साँझ दीप प्रज्वलन गर्नका लागि पनि नगरवासीहरुलाई आग्रह गरेको छ ।
