भैरहवा । सशस्त्र प्रहरी बल नेपाल, सीमा सुरक्षा गुल्म हे.क्वा. डण्डा रुपन्देहीका प्रमुख सशस्त्र प्रहरी नायव उपरीक्षक गोपिकृष्ण भट्टराईको नेतृत्व र सक्रियतामा अवैध सीमा ओसारपसार नियन्त्रण कार्यलाई तीव्र पारिएको छ । सीमा क्षेत्रमा कडाइ गर्ने क्रममा सशस्त्र प्रहरीको टोलीले भारतबाट भन्सार छली नेपालतर्फ ल्याउँदै गरेको ठूलो परिमाणको कस्मेटिक सामान र चौपाया नियन्त्रणमा लिन सफल भएको छ ।
प्रहरी नायव उपरीक्षक भट्टराईकै प्रत्यक्ष कमाण्डमा खटिएको टोलीले जिल्लाको रोहिणी गाउँपालिका–१ सेमरपानी इलाकामा जाँच गर्दा करिब रु सात लाख तीन सय ५० बराबरको अवैध कस्मेटिक सामान बरामद गरेको छ । उहाँको नेतृत्वमा सीमा सुरक्षालाई थप चुस्त बनाउँदै चोरी-पैठारी रोक्न प्रहरी टोली अहोरात्र खटिएको छ ।
यसैगरी, सोही इलाकामा खटिएको अर्को टोलीले पनि अवैध रूपमा भन्सार छली ल्याइएका रु ४० हजार मूल्य बराबरका चार वटा पाडा नियन्त्रणमा लिएको छ । सीमावर्ती क्षेत्रमा हुने अवैध गतिविधि र राजस्व चुहावट नियन्त्रणमा डण्डा गुल्मले देखाएको यो सक्रियतालाई निकै सकारात्मक रूपमा लिइएको छ । नियन्त्रणमा लिइएका सम्पूर्ण सामान र चौपायालाई आवश्यक कारबाहीका लागि सम्बद्ध निकायमा पठाउने प्रक्रिया अघि बढाइएको डण्डा गुल्मले जनाएको छ ।
