भैरहवा । नेकपा एमालेले रुपन्देहीका पाँचवटै निर्वाचन क्षेत्रका लागि उम्मेदवारहरूको नाम टुंगो लगाएको छ। पार्टीको निर्णयअनुसार क्षेत्र नम्बर १ मा दधिराम न्यौपाने, २ मा उपाध्यक्ष विष्णुप्रसाद पौडेल, ३ मा वासुदेव घिमिरे, ४ मा सुनिता ठटेर र ५ मा खिमलाल भट्टराईले उम्मेदवारी दिने भएका छन्। यसपटक एमालेले रुपन्देहीमा उपाध्यक्ष पौडेल र घिमिरेबाहेक अन्य तीन क्षेत्रमा नयाँ अनुहारलाई अवसर दिएको छ।
विगतमा क्षेत्र नम्बर १ बाट लगातार उम्मेदवार बन्दै आएका पार्टी सचिव छविलाल विश्वकर्माले यसपटक दधिराम न्यौपानेलाई अघि सारेका छन्। त्यस्तै, राष्ट्रिय सभा सदस्य रहेका जिल्ला इन्चार्ज खिमलाल भट्टराई र जिल्ला उपसचिव सुनिता ठटेर पहिलो पटक प्रतिनिधिसभाको प्रत्यक्ष निर्वाचनमा प्रतिस्पर्धा गर्दैछन्। उता ०५६ सालदेखि बुटवल क्षेत्रबाट निरन्तर उम्मेदवार बन्दै आएका विष्णुप्रसाद पौडेल पुनः सोही क्षेत्रबाट मैदानमा उत्रिएका छन्।
