गुल्मी । गुल्मीको ऐतिहासिक तथा धार्मिक पर्यटकीय स्थल रेसुंगामा साउन महिनाभर सञ्चालित एक महिने मेलाका क्रममा भक्तजनबाट संकलित भेटी गणना सुरु गरिएको छ। रेसुंगा संरक्षण समितिका अनुसार महापोखरी, सिद्धस्थान, गरुडस्थान, शिवालय, भोला मन्दिर र रामकुवा लगायतका धार्मिक स्थलमा संकलन भएको भेटी गणना गर्न थालिएको हो। समितिका अध्यक्ष सुरेशचन्द्र भुसालले गणना सकिएपछि यस वर्षको कुल भेटी रकम सार्वजनिक गरिने जानकारी दिनुभयो।
साउन महिनाभर देशका ७७ वटै जिल्लाका साथै भारतका गोरखपुर, दिल्ली र राजस्थान क्षेत्रबाट गरी करिब डेढ लाख भक्तजनले रेसुंगाको दर्शन गरेका छन् । गत वर्ष साउने मेलाबाट रु १३ लाख १८ हजार १५६ भेटी संकलन भएकोमा यस वर्ष दर्शनार्थीको संख्या बढेकाले भेटी रकमसमेत वृद्धि हुने अनुमान गरिएको समितिका कोषाध्यक्ष नेत्रबहादुर बस्नेतले बताउनुभयो। हाल गौशाला संरक्षणका लागि रु ३५ लाख र रेसुंगा संरक्षण समितितर्फ रु ४५ लाख अक्षयकोषमा रहेको समितिले जनाएको छ।
