भैरहवा । भैरहवास्थित नापी कार्यालयमा आउने सेवाग्राहीसँग काम छिटो गराइदिने प्रलोभन देखाएर बढी शुल्क लिने दुई जनालाई प्रहरीले पक्राउ गरेको छ । जिल्ला प्रहरी कार्यालय, रुपन्देहीबाट खटिएको विशेष टोलीले शुक्रबार दिउँसो उनीहरुलाई कार्यालय परिसरबाटै नियन्त्रणमा लिएको हो ।
पक्राउ पर्नेमा रुपन्देहीको ओमसतिया गाउँपालिका–३ का ३२ वर्षीय शिव नारायण कुर्मी र रोहिणी गाउँपालिका–३ का ३० वर्षीय सुरेन्द्र मल्लाह रहेका छन् । उनीहरुले कार्यालयमा आउने सर्वसाधारणलाई विभिन्न बहानामा दु:ख दिने र छिटो काम मिलाइदिने भन्दै बिचौलियाको भूमिका खेली गैरकानूनी रुपमा रकम असुल गरिरहेको अवस्थामा फेला पारिएको प्रहरीले जनाएको छ ।
जिल्ला प्रहरी कार्यालय, रुपन्देहीका सूचना अधिकारी एवं प्रहरी नायव उपरीक्षक (डीएसपी) कृष्ण कुमार चन्दका अनुसार पक्राउ परेका दुवै व्यक्तिमाथि थप अनुसन्धान भइरहेको छ । पछिल्लो समय सरकारी कार्यालयहरुमा बिचौलियाको बिगबिगी बढेको जनगुनासो आएपछि प्रहरीले निगरानी बढाएको हो । यस सम्बन्धमा थप कानूनी प्रक्रिया अगाडि बढाइने र अनुसन्धान कार्य जारी रहेको प्रहरीले जानकारी दिएको छ ।
