भैरहवा । लुम्बिनी विकास कोष भित्र रहेका बौद्ध विहारहरुले पर्यटकलाई होटलको सुविधा दिएको भन्दै लुम्बिनीका होटल व्यवसायीहरुले विरोध जनाएका छन् । होटल व्यवसायीहरुले वर्षौ देखि कोष भित्रका विहारहरुमा सञ्चालित होटलको विरोध गर्दै आएका छन् । यसको दिर्घकालीन व्यवस्थापन गर्न ७ दिने अल्टिमेटम सहित व्यवसायीहरुले लुम्बिनी विकास कोषलाई ज्ञापन पत्र बुझाएका छन् ।
विहार र गुम्बामा बौद्ध आध्यात्मिकता र बौद्ध भावनाको नमूना होइन व्यापारको थलो बनेको भन्दै व्यवसायीहरुले बिरोध जनाएका हुन् । “लुम्बिनी आउने पर्यटकहरुलाई तिर्थालुको नाममा यी गुम्बाहरुमै होटलको सुविधा दिई राख्ने गरिएको छ,” लुम्बिनी होटल संघका अध्यक्ष गोविन्द ज्ञवालीले भने “यसले हामी बेरोजगार हुने अवस्थामा पुगेका छौं ।”
विहारहरुमा सञ्चालित होटलका कारण कोष बाहिर सञ्चालित करिब ९५ वटा होटलहरु खाली रहने गरेको व्यवसायीहरुको गुनासो छ । उनिहरुले विहारमा सञ्चालित यस्ता होटलहरुमा मांसाहारी खानाको साथै मदिरा सम्म चल्ने गरेको आरोप लगाउदै आएका छन् ।
कोष भित्र सञ्चालित यस्ता होटलहरुलाई लुम्बिनी विकास कोषले संरक्षण गरेको होटल व्यवसायी संघका अध्यक्ष ज्ञवालीले आरोप लगाए । “गुरुयोजनाको मर्म विपरीतको कार्यको संरक्षण यो वा त्यो नाम दिएर लुम्बिनी विकास कोषका केही मानिसले गर्दै आएका छन् ।” उनले भने “यसले निजी क्षत्रको ठूलो लगानी, पेशा व्यवसायलाई संकटमा पुर्याएको छ ।”
स्थानीय व्यवसायीको धर्यको सीमा समाप्त अब भएको र अब यसभन्दा अघि पर्खन सक्ने अवस्था नरहेको लुम्बिनी होटल संघद्वारा बुझाईएको ज्ञापनपत्रमा उल्लेख छ । एक साताको अल्टिमेटम दिदै सो अवधिमा समस्या समाधान नभए मायादेवी मन्दिर अगाडी धर्ना बस्ने संघका अध्यक्ष गोविन्द ज्ञवालीले चेतावनी दिएका छन् ।
