नवलपरासी । राष्ट्रिय प्रजातन्त्र पार्टी (राप्रपा)का अध्यक्ष एवं पूर्वउपप्रधानमन्त्री राजेन्द्रप्रसाद लिङ्देनले राष्ट्रिय हित र मुलुकको विद्यमान समस्या समाधानका लागि राजनीतिक दलहरूबीच राष्ट्रिय सहमति अपरिहार्य रहेको बताउनुभएको छ। पश्चिम नवलपरासीमा आयोजित राप्रपा नवलपरासीको जिल्ला अधिवेशनलाई सम्बोधन गर्दै अध्यक्ष लिङ्देनले देश जटिल र असामान्य परिस्थितिबाट गुज्रिरहेकाले सबै दलहरू निषेधको राजनीतिभन्दा माथि उठेर सहकार्य र सहमतिको बाटोमा आउनुपर्नेमा जोड दिनुभयो।
कार्यक्रममा राप्रपा उपाध्यक्ष एवं पूर्वमन्त्री ध्रुवबहादुर प्रधानले नवलपरासीका नेता तथा कार्यकर्ताहरूमा एकता, संगठन र एजेन्डाप्रतिको निष्ठा रहेको उल्लेख गर्नुभयो। यस्तै रामग्राम नगरपालिकाकी नगर उपप्रमुख संझना चौधरीले पार्टीभित्र अग्रजहरूको अनुभव र युवाको ऊर्जालाई समायोजन गर्दै स्वस्थ प्रतिस्पर्धाका आधारमा संगठन निर्माणमा लाग्नुपर्नेमा जोड दिनुभयो। अधिवेशनमा प्रतिनिधि सभा सदस्य ताहिर अलि, राप्रपा जिल्ला अध्यक्ष ओमबहादुर सिंह, नेपाली कांग्रेसका कार्यवाहक अध्यक्ष विक्रम यादव र युवा नेता मनोहर रायमाझी लगायतले शुभकामना मन्तव्य व्यक्त गर्नुभएको उक्त कार्यक्रमको सञ्चालन सुमिना चौधरीले गर्नुभएको थियो।
