भैरहवा । रुपन्देहीको सिद्धार्थनगर नगरपालिका वडा नम्बर १ कार्यालयले गर्भवती महिलाहरूलाई पौष्टिक आहार वितरण गरेको छ । वडा कार्यालयमा आयोजित एक कार्यक्रममा २१ जना गर्भवती महिलालाई पौष्टिक आहार प्रदान गरिएको वडा अध्यक्ष उज्जवल पोखरेलले जानकारी दिनुभयो ।
वडा अध्यक्ष पोखरेलले यो कार्यक्रम प्रत्येक वर्ष सञ्चालन हुँदै आएको बताउनुभयो । उहाँले सोही अवसरमा व्यक्तिगत घटना दर्तालाई समयमै गराउन सबैमा आग्रह गर्नुभयो । "जन्म, विवाह लगायतका व्यक्तिगत घटना दर्ता घटना भएको ३५ दिनभित्रै गराउन म सबैलाई आग्रह गर्दछु," उहाँले भन्नुभयो । समयमै घटना दर्ता गराउने परिवारका लागि वडा कार्यालयले प्रोत्साहन स्वरुप विभिन्न कार्यक्रमहरू सञ्चालन गर्दै आएको पनि उहाँले जानकारी दिनुभयो ।
महिला स्वास्थ्य स्वयंसेविका अमिता श्रेष्ठको स्वागत मन्तव्य र वडा सचिव विनोद कुमार कर्णको सञ्चालनमा सम्पन्न भएको उक्त कार्यक्रममा आधारभूत स्वास्थ्य केन्द्र प्रमुख जानुका जि.सी., मिन बहादुर गुरुङ र असर्फी हरिजन लगायतले आफ्ना भनाइ राखेका थिए।
